مناديل يا بيه ؟
* إنت اسمك ايه ؟
- محمود يا باشا وبينادوني ساعات ضبش
* وكام سنة ؟
- عشرين شتا ، عشرين عطش
عدوا كما ورق الشجر
بينتحر وقت الخريف
* هات كرسي واقعد
تشرب ايه ؟
- لو كان ضروري يبقى شاي
ويكون تقيل سكر خفيف
" طلع سجايره م الجاكته ومد إيده للولد "
* عفر
- بعفر كل ساعة وكل وقت
دخاني عمره ما كان سجاير م اللي فـ العلب الورق
دخاني كان شبورة فرط
وتراب بسفه ع الطرق
دخاني كان ريحة شياط عمر اتحرق
وانداس كتير م التورمايات علشان جنيه
" ولع سيجارته وشد منها كام نفس "
* حاسس أوي باللي انت فيه
- كداب .. يا بيه !
* إزاي ؟ و ليه ؟
- علشان مفيش إحساس بيصدق إلا لو كان تجربة
" شرب الولد شايه التقيل
اللي أخف على لسانه كتير أوي
من حمل شايله فوق كتافه من زمن
المر زي
عيشته الصعيبة المنهكة
والمتعبة "
- جاوبني بس
من قبل ما تقول لي : بحس
جربت تلتحف الكباري عشان تنام ؟
جربت تنداس تحت عجلات الزحام ؟
جربت مرة توطي على ركبك عشان
تلم حلمك / لقمتك
من ع السكك ؟
جربت يا أستاذ تموت فيك برائتك
إحتياجك
قلبك اللي دق مرة لما شاف بنت الجيران
ومكانش فـ جيوبه عشان
يطلب تزوره فـ المنام حتى الـ " مفيش "
جربت تقتل كل دول
علشان تعيش ؟
جربت تهرب م التذاكر
والعساكر
والشاويش ؟
جربت تستخسر فـ عينك منديلين
يبلسموا ويطبطبوا
ولقيتها أوفر لك إذا
قررت تبلع دمعتك ؟
جربت تفضل طول ليالي وحدتك
بتلصم الحتة اللي فاضلة فـ جتتك
علشان تبان الصبح فـ الإشارات سليم
وتبان قوي ؟
لو قلت آه
تبقى يا بيه كداب أوي
لو لأ وده أكيد الجواب
يبقى بلاش تعقد جبينك
وتقول انك
حاسس اللي بحس بيه
متشكرين ع الشاي يا باشا
بس انا هحاسب عليه
مناديل يا بيه
مناديل يا بيه
لأخويا الغالي أحمد مدره
أحمد بك مدره